 |
Manok saboh coh boh puték
Aneuk iték di mita glang
Reusam tuka masa meubalék
Ka kha adék ka talô bang,
Buet tan sigak tulak tarék
Sidroe haék sidroe sayang
Sidroe dawa kha bak asék
Sidroe peuték keu'ih lam blang,
Biasa ta eu tulak tarék
Sosok bang cék gogajoe pang
Koh bak kayèe rujèe bilék
Tulak tarék gogajoe cang,
Tapi jinoe paloe burék
Tulak tarék buet meusugang
Sang meunoe kon kalon haék
Meudéh bayék tapeutimang,
Meunoe nyang pah bagah asék
Meudéh reulék h'ana timang
Kheun nyong sidroe meunoe h'aék
Peue keu adék nyoe pat abang,
Meunyo bak buet jeu eut tarék
Dak ta tabék akhé guyang
Dak tapujoe dudoe picék
Buet tan baék akhé reungang,
Jinoe hireun jameun burék
Ureueng bayék ka meusugang
Ureueng bangai akai lisék
Ureueng cerdék ulèe mumang,
Baca juga : Syeh Medya Hus: Generasi Muda Aceh Harus Mengenal Seni Tradisi
Ureung sang'öng na nyang tabék
Ureueng bayék tan soe sayang
Di ceurapè h'an lé iték
Manok burék ka ngon musang
Nyang hak jeungkai usai tarék
Nyang hak giték di peupanyang
Nyang hak taba ka jitarék
Nyang hak tabék di peuceukang,
Katrôh masa mulia burék
Nyan ie parék ka di hidang
Nyö ie madu laju h'an ék
Tulak tarék di kheun wayang
Nyang tan muphôm kahôm asék
Nyang lisék lisék timang timang
Cuma nyang dong sang'öng picék
Eu gob tarék taloe tambang,
Tanyoe nyang jroh bèk koh adék
Ta meubayék seusaboh nang
Samboh Bangsa bék na burék
Saboh bilék Meugaséh sayang,
Cek Medya Hus