Oleh: Cek Medya Hus
 |
Deungon Bismillah surah lôn rampoe
Nibak watèe nyoe bacut lôn peugah
Haba corona nyang ka bak tanyoe
Virus bahya nyoe mantong meuwabah
Beuna waspada uleh geutanyoe
Bèk piké adoe atra nyoe ka glah
Bèk piké tanlé kareulé padoe
Covid 19 nyoe mantong na wabah
Beuna ta ingat bèk batat tanyoe
Tapiké keudroё yôh goh meusibah
Béna himbauan saban tapakoe
Bèk jeut keu rugoe oh akhé teulah
Jaga keluarga jaga droe keudroe
Bèk gadôh jak woe le ho ta langkah
Nyö peunténg hana ka keuh neu iemdroe
Di rumöh tanyoe pubuet peue nyang pah
Karna bak tajak hai bapak kamoe
Meunan cit adoe nyang muda gagah
Tan turi ureueng sareueng virus nyoe
Meugumoe gumoe di po ie babah
Dalam keramaian di peukan tanyoe
Hana ta tusoe ureueng meuwabah
Kareuna le that rakyat geutanyoe
Kesehatan droe hana geupeugah
Peue lom na ladom gob nyan ban geuwoe
Di lua nanggroe wahé e ayah
Hana ta teupeue uleh geutanyoe
Karoh tapeutoe di langkot wabah
Beuna waspada sigra lé jinoe
Jaga jarak tanyoe laju beubagah
Nyan imun tubôh bèk layôh asoe
Makeuen hai adoe protein beupah
Bak warông kupi nyan pi bèk toe toe
Si déh ngon sinoe taduek beupah pah
Lheueh tajéb kupi laju beu tawoe
Bèk that meulaloe nyan hana got pah
Watèe ta kalon ka dua uroe
Rata jeut sagoe ureueng that gairah
Lheueh buka jalan nyang geutôp baroe
Jeum malam dudoe bèk lé geupeugah
Geupiké ladôm ka aman buet nyoe
Hana lé keunoe virus meuwabah
Ureueng ka sibuk gabuek ka laloe
Bak warông meugumoe ureueng geulangkah
Geupiké tan lé kahasé virus nyoe
Kajeut lom tanyoe jak ho talangkah
Beuna neupiké wahé rakan droe
Suai virus nyoe tanyoe goh lom glah
Beuna ta ingat meuhat rakan droe
Nyang ka geuhimboe neupateh bagah
Miseue na ho jak jarak deungon toe
Masker hai adoe beuna bak babah
Taja jarak ho tajak tanyoe
Jaga rakan droe virus meuwabah
Kareuna jangka na peut blah uroe
Nyan dokto meuproe ta patéh bagah
Di sampéng usaha ta patéh himboe
Tapatéh tanyoe peue dokto peugah
Dan tameudôꞌa beuna lé tanyoe
Malam ngon uroe lakèe bak Allah
Jiꞌôh peunyakét nyang phét lagèe nyoe
Di nanggroe tanyoe gadoh beubagah
Nyan tameulakèe teuntèe lam jeut syoe
Όh lheuh geutanyoe tapujoe Allah.
Dan ta meudôꞌa keupada dokto
Tim medis bako kerja lam tabah
Demi meurawat meuhat pasien nyoe
Urumoh tan woe seudeh meuleumpah
Talakèe dôꞌa bak Tuhan sidroe
Tim medis tanyoe lindôngan Allah
Got that le jasa bak masa jinoe
Malam ngon uroe pasien geupapah
Aneuk cém pala ateueh bak kreutoe
Aneuk beuragoe ateuh bak jeumpa
Kasép keuh haba raka saat nyoe
Meuꞌah ulôn nyoe kadang na gasa